الشاعر سعيد سعيد إمام يكتب سجن الصمت

 

سجن الصمت

إحنا مش محتاجين نعيد نفس الكلام

ولا نحفظ شعارات ونعيشها أوهام

إحنا محتاجين عقل يواجه الزحام

ويقول الحقيقة حتى في وش الطغيان 

بقى الخوف ساكن جوا العقول

وكل فكرة حرة حواليها ألف سور وفصول

لو واحد حلم قالوله بلاش الفضول

وامشي جنب الحيط قبل ما العمر يطول

قتلوا السؤال جوا عيون الصغير

وعلموه يمشي ورا أي صوت كبير

ما يفكرش ما يرفضش ما يبقاش خطير

كأن العقل الحر بقى ذنب عسير

بقينا نستهلك كل شيء حتى الأحلام

ونعيش عمرنا نردد نفس الكلام

لا فكر جديد ولا خطوة قدام

ولا حد بيسأل ليه ضاع السلام

الأمم ما بتموتش بقلة المال

الأمم تموت لما الفكر ينهار

لما يبقى المبدع عايش في حصار

والجاهل فوق والمخلص منهار

إوعى تصدق إن التغيير مستحيل

كل اختراع كان يوم فكرة في عقل أصيل

وكل نور كبير بدأ بخيط نحيل

بس صاحبه آمن بيه رغم الطريق الطويل

حرر عقلك من خوف السنين

واكسر قيود الوهم والتلقين

الدنيا ما بتفتحش بابها للساكتين

لكنها تفتح للمؤمنين بالحلم واليقين

يمكن كلمة توعظ ألف عقل نايم

ويمكن فكرة تبني مجد دايم

ويمكن طفل يسمعك ويبقى عالم

يغير شكل الدنيا في يوم قادم

يا رب ارزقنا عقول ما تعرفش الجمود

ونفوس تؤمن إن العلم هو الخلود

وتبني أوطانها بالفكر والمجهود

مش بالصوت العالي والكلام المردود 

الشاعر سعيد سعيد إمام