بنت اسمها إيلا
كتب إبراهيم الطير
الأب
إيلا يا بنتي انتي نعمة من ربنا أنا بشوف فيكي كل حياتي
إيلا
ربنا يخليك ليا يا بابا أنا نفسي أفضل دايما عند حسن ظنك
الناس
إيلا بنت محترمة مؤدبة ومتفوقة الكل بيشهد بأخلاقها
الأب
أنا مش خايف عليها طول ما ربنا معاها
دخل شاب حياتها عن طريق الحلال
الخاطب
أنا شغال كويس ومسافر وبرتب مستقبلي وعايز أفتح بيت على أساس محترم
الأب
أهم حاجة تخاف عليها وتراعي ربنا فيها
تم الزواج وسط فرحة كبيرة
في البداية كان كل شيء هادئ
إيلا
أنا حاسة إني بدأت حياة جديدة ربنا يديمها نعمة
لكن الهدوء لم يدم
إيلا
انت بتتأخر ليه كل يوم
الزوج
شغل
إيلا
وشك متغير وطريقتك بقت غريبة
الزوج
مالكش دعوة
مرت الأيام وبدأت الحقيقة تظهر
إيلا
الصحبة دي مش مريحة ليه بتقعد معاهم كتير
الزوج
دول أصحابي
إيلا
أنا شايفة إنهم بيضيعوك
الزوج
انتي هتفهمي أكتر مني
بدأت تلاحظ عليه أشياء غريبة غياب طويل عصبية بدون سبب طلب مستمر للمال
إيلا
الفلوس بتروح فين
الزوج
هاتي اللي معاكي وخلاص
إيلا
أنا قلقانة عليك
الزوج
سيبيني في حالي
اكتشفت الحقيقة
إيلا
انت بتتعاطى
الزوج
وانتي مالك
إيلا
ده هيضيعنا
الزوج
أنا حر
بدأت المعاناة
إيلا
حرام عليك كفاية
الزوج
هاتي فلوس
إيلا
دي فلوس البيت
الزوج
كله واحد
حاولت تنقذه
إيلا
تعالى نروح مستشفى نبدأ علاج
الزوج
أنا مش مريض
إيلا
ده طريق نهايته وحشة
الزوج
مش شغلك
ذهبت به أكثر من مرة للعلاج لكنه كان يعود لنفس الطريق مع نفس الصحبة
إيلا
ارجوك عشان بيتنا
الزوج
مفيش فايدة
حملت إيلا
إيلا
يمكن لما يعرف إن في طفل جاي يتغير
لكن لم يتغير شيء
بعد الولادة
إيلا
دي بنتك شوفها
الزوج
سيبيني في حالي
لم تسلم حتى الطفلة من هذا الواقع
إيلا
انت خدت فلوس البنت
الزوج
هحتاجهم
إيلا
دي حقها
الزوج
خلص الكلام
أصبح الضرب والإهانة جزء من يومها
الطفلة تبكي
إيلا
كفاية قدام بنتك
الزوج
اسكتي
في يوم تغير كل شيء
الزوج
اطلعي بره الشقة دي مش ليكي
إيلا
أنا فين أروح أنا وبنتك
الزوج
مش شغلي
وقفت وحدها لكنها لم تستسلم
المحامي
حقك ترجعي شقتك بالقانون
إيلا
أنا عايزة أعيش في أمان بس
حصلت على حكم ورجعت
إيلا
ايه اللي حصل هنا
الجارة
هما ما سابوش حاجة زي ما هي
إيلا
يعني ايه
الجارة
باب الشقة متخلع الشبابيك متشالة سلك الدش والنت مقطوع المية متقفلة ومش واصلة للشقة حتى قاعدة الحمام متخلعة ومطموسة بالاسمنت
إيلا
ليه كل ده
الجارة
كانوا عايزين يكسروا فيكي
إيلا
حسبي الله ونعم الوكيل
الأب
أنا جنبك يا بنتي متخافيش
إيلا
أنا تعبت بس مش هسكت
الأب
بس انتي قوية وهتقفي تاني
حاولوا يكسروا نفسيتها
الزوج
انتي بتتخيلي
أم الزوج
انتي السبب
إيلا
أنا شايفة كل حاجة ومش هكذب نفسي
بدأت تجمع نفسها من جديد
إيلا
أنا هعيش أنا وبنتي حتى لو من الصفر
الأب
دي بنتي القوية
إيلا
أنا مش عايزة غير حياة آمنة ليا ولها
مرت الأيام وبدأت ترتب حياتها من جديد خطوة خطوة
إيلا
مش مهم أبدأ منين المهم إني ما أرجعش لنفس الوجع
الأب
ربنا بيعوض الصابرين
إيلا
أنا صبرت كتير وربنا مش هيسيبني
0 تعليقات